澳職常規賽煞科，排第2嘅中岸水手主場鬥阿德萊德聯。中岸水手現落後榜首威靈頓鳳凰1分，今場只要唔輸即可登上今季常規賽寶座，佢哋近6次對阿德萊德聯錄5勝1負，擺明格食格，主勝有計。(無綫my聽TV聽SUPER周三下午5時直播)
中岸水手同威靈頓鳳凰鬥足大半季，一直都係鳳凰領先，直至早前兩軍交手，中岸水手2比1擊敗鳳凰，形勢先至改變，鳳凰已經完成所有賽事而僅領先1分，澳職同分係先計勝仗較多球隊，現時中岸水手比鳳凰勝仗多1場，換句話說，中岸水手今場和波足以奪冠。
睇番中岸水手近況相當勇猛，聯賽4連勝勒都勒唔住，就算首席射手安祖托利斯缺陣，仲有常規賽助攻王祖殊尼斯畢交出好表現，贏波只係簡單任務。
阿德萊德聯後防多甩漏
阿德萊德聯無緣季後賽，今場係今季最後一戰，佢哋踢法開放，面對實力強勁對手都唔會縮後，而會選擇對攻，上場就以4比3擊敗布里斯班獅吼，全季攻入52球屬澳職並列最多，不過球隊後防多甩漏，全季共失51球，預料難擋中岸水手來犯，輸波屬意料中事。