周六早上美洲盃A組首輪賽事，秘魯硬撼智利。秘魯一向守強攻弱，不過智利仍然處於青黃不接，預計今仗戰況處於拉鋸局面，秘魯夠韌可頂住唔輸，讓球主勝不容錯過。
（HOY聽TV聽77台周六早上8時直播）
秘魯甚少出現多產前鋒，雖然今次仍有前拜仁箭頭荷西古里路助陣，但呢位隊長已經40歲喇，頂盡都係做後備同穩定軍心，幫唔到幾多。秘魯各項賽事近10場只入8粒，其中4球係來自「拍跳」大勝多明尼加共和國，即係其餘9場入得4粒咁大把，攻力極度疲弱，好彩防守尚算穩健，呢10場有9次開2球或以下，單計近5場錄得3勝2和，走出早前連敗谷底，重拾信心。
老將孭飛捱「細」界
另邊廂，智利換血工作唔多順利，年逾30嘅阿歷斯山齊士、伊度亞度華加斯、伊斯拿等兩屆美洲盃冠軍功臣仍在陣中，甚至連40歲嘅門將哥迪奧巴禾仲有入選，雖然呢班老將未必場場披甲，但從中亦反映智利年輕一輩仍未接到班。論實力智利應該稍稍秤先，不過佢哋各項賽事近6場只得2勝1和3負，表現極不穩定，遇上擅於鬥磨嘅秘魯，預計會處於膠着；秘魯今場受讓捧得過，2.5球入球細亦可兼投。