周二凌晨瑞典超賽事，諾高平喺主場迎戰佐加頓斯，兩隊近況差距極大，諾高平輸到冇晒信心，力圖爭標嘅佐加頓斯唔會放過打「諾」水狗機會，一於熱捧客勝！（周二凌晨1時開賽）
現時排聯賽第3位嘅佐加頓斯，上輪不敵哈馬比令爭標大受打擊，不過佢哋比前面兩支球隊踢少兩場及一場，只要及時振作，仍然有機會趕上，今場遇上弱旅必定搏到盡。事實上，佐加頓斯近況唔差，上場輸波前曾造出聯賽6連勝，而且作客表現非常優異，近5場聯賽作客贏咗4場，相當可靠。
諾高平近6聯賽失20球
諾高平係目前瑞典超狀態最差嘅球隊，上場聯賽1比5慘敗天狼星腳下，對上6場聯賽1和5負，當中有3場係以4球大敗，而且6場比賽合共失咗20球，防線形同虛設。睇埋兩隊近4次對賽，佐加頓斯亦有3勝1和成績，近況同往績都食住對手，今仗必捧客勝。