阿仙奴及曼聯兩支英超兵，於美國加州炮製首場重量級熱身賽「仙魔戰」。兩軍都有球員因歐國盃或美洲盃尚未報到，以後備兵源及青年球員質素計，「兵工廠」似乎較勝一籌，加上兩軍近4次交手，阿仙奴獲3勝1負，睇好今場阿仙奴可以贏波而回。
（Now聽640周日早上8時直播）
曼聯着新作客衫開騷
講真，呢啲熱身賽其實都係搵錢嘅啫，今場曼聯估計會着啱啱公布嘅海軍藍作客波衫，場波咪當係Fashion聽Show囉。事實上，曼聯完成對洛辛堡同格拉斯哥流浪嘅熱身賽，錄得1勝1負，但拉舒福特似狀態未起，上仗鬥格流連後備都無份，而且坦哈格連續兩場都只係畀正選球員半場發揮機會，下半場以小將為主。
如果計後生仔，逐個秤嘅話，兵工廠班小朋友質素比紅魔鬼好，早兩日首場熱身賽鬥般尼茅夫，17歲翼鋒華拿利侵略性強，作出多次個人突破，而加比爾捷西斯及馬田奧迪加特級數亦高，後備上陣半場輕舒腳頭，為今仗操起，而且領隊阿迪達戰術體系穩定，球員可以輕鬆入局，加上兩軍近4次交手，阿仙奴獲3勝1負，今場可以睇高一線。