今晚女奧足B組尾輪大戰，澳洲女足火併美國女足。「袋鼠女」上場絕地反勝士氣大振，為爭出線必不作保留；美國女足同樣攻力強勁，鬥攻格局2.5球大盤咪錯過。（HOYTV聽76台周四凌晨1時直播）
澳洲女足首輪慘吞德國女足3蛋，上輪面對同組最弱嘅贊比亞女足，竟然一度落後2比5，但佢哋並冇放棄，最終連入4粒反勝6比5，上演奇迹大逆轉，左閘絲達卡妮梅開二度之餘，更加交出兩個助攻，絕對係反勝英雌，為球隊取得重要3分，信心返晒嚟，重燃爭次席或最佳第3名出線機會，佢哋近5場奧運賽事法定時間4次開3球或以上，今仗可照辦煮碗。
美國提早出線唔怕鬥攻
另邊廂，美國女足雖然有雅歷絲摩根等名將淡出，但仍保持勁旅本色，於今屆頭2輪分組賽贏晒狂轟7球，包括上輪大勝德國女足4比1，蘇菲亞史密芙與瑪萊利史雲遜夾埋入咗5粒，攻力有保證。事實上「美女」近6場各項賽事5勝1和，狀態極勇，加上提早鎖定出線資格，冇心理包袱下，唔怕同你鬥攻，今仗等睇入球騷。